Milan K. O prezo da supervivencia

Argumento

Esta primeira entrega da serie supuxo o debut conxunto do guionista americano coñecido polo pseudónimo de Sam Timel e do debuxante Corentin (París, 1983). A vida de Micha Khodorov cambia de súpeto e desde a infancia coñece o que significa perdelo todo cando seu pai, un rico e poderoso empresario, se converte en obxectivo do goberno ruso. Comeza entón para o rapaz unha amarga experiencia na compaña do seu fiel gardacostas Igor, marcada polas ameazas e as fuxidas, sempre baixo unha nova identidade.

Unha trepidante intriga que conxuga varios atractivos: un protagonista adolescente, a figura do fuxitivo, diversas accións paralelas en localizacións que van de Moscova, ás beiras do Lago Léman, Os Ánxeles ou Nova York, escenas de acción e episodios intimistas, conspiracións políticas e financeiras, persecucións... Este episodio inicial abre moitas interrogantes: Que acontecerá con Igor? Que nova vida levará Micha no futuro?