Argumento
«Ana ye un casu estremu de muyer que vivió a la parte d’afuera de la sociedá, qu’escoyó la naturaleza por abellugu y comulgó con ella. Representa l’antítesis del home llibre, el buen salvaxe, que se val de la so intelixencia p’aprovechar los recursos qu’atopa, que domina y controla gracies a la so fuerza y a la superioridá moral, a los animales. Tolo contrario qu’ella, que caltién una perversa afinidá coles besties, qu’adoma a los llobos, hasta’l puntu de que, criminal como ye, van poniéndose-y traces casi animales. L’home ye cultura. Ella nun ye capaz de controlar los sos instintos más primitivos y déxase llevar polo más malinu de la natura. Nun hai domesticación, hay poder y, como nun pue ser d’otru mou, pola so debilidá como muyer, un poder perversu, demoniacu». [Marta Elola]
«La historia d’Ana María García, la llobera d’Asturies, podía contase guapamente con otres palabres, pero estes coles que nos h.abla esta muyer ayúdenos a imaxinar una vida tan poco normativa pal so tiempu dende la periferia llingüística d’un presente representáu por una variedá que caltién el tastu de la tierra, qu’entovía s’interpreta, sobremanera pola so situación xeográfica, dende la marxinalidá de lo que (llingüísticamente) nun se concibe como norma. Pero bien ye verdá que nun hai centros ensin periferies, y ye por esto qu’ha entendese esta propuesta como un exerciciu de creación lliteraria qu’empata de toes toes, tamién en campu de lo llingüísticu, cola tradición lliteraria asturiana contemporánea». [María Cueto]